காரைநகர் இந்துக் கல்லூரி உயர்தர மாணவர் ஒன்றியத்தினால் ஆண்டுதோறும் ‘நதி’ என்ற சஞ்சிகை, வெளியீடு செய்யப்பட்டு வருகிறது. ஆசிரியர்களினதும, மாணவர்களினதும் அறிவியல், கல்வி சார்ந்த ஆக்கங்களைத் தாங்கி வெளிவருகின்ற இச்சஞ்சிகையின் இவ்வாண்டுக்கான இதழ் செவ்வாய்க்கிழமை நடைபெறவுள்ள உயர்தர மாணவர் ஒன்றியத்தின் வருடாந்த விருந்துபசார நிகழ்வின்போது வெளியிட்டு வைக்கப்படவுள்ளமை குறித்து பழைய மாணவர் சங்கத்தின் கனடாக் கிளையினால் அனுப்பிவைக்கப்பட்டு வெளிவரவுள்ள இதழில் பதிவுசெய்யப்பட்டுள்ள வாழ்த்துச் செய்தி கீழே எடுத்துவரப்பட்டுள்ளது.

வாழ்த்துச் செய்தி

காரை.இந்து அன்னையின் மைந்தர்கள் புலம்பெயர்ந்து வாழ்ந்தாலும் தமது வாழ்வை வளம்படுத்திய இந்து அன்னையை மறவாது அதன் வளர்ச்சிக்கு உதவி வருவது மட்டுமல்லாது அது ஏற்படுத்தி வருகின்ற சாதனைகளையும், மாணவர்களை நல்வழிப்படுத்தி வருகின்ற நல்ல பல செயல்களையும் அறிந்து பெருமிதமும், பெரு மகிழ்ச்சியும் அடைந்து வருகின்றனர். அந்த வகையிலேயே உயர்தர மாணவர் ஒன்றியத்தினால் ‘நதி’ என்ற மகுடத்துடனான சஞ்சிகை ஆண்டுதோறும் வெளியிடப்பட்டு வருவது அறிந்து பழைய மாணவர் சங்கத்தின் கனடாக் கிளை பேருவகையடைகின்றது. இவ்வாண்டு வெளியிடப்படுகின்ற ‘நதி’ சஞ்சிகைக்கு வாழ்த்துக் கூறக் கிடைத்த வாய்ப்பிற்கு மகிழ்வதுடன் உளமார வாழ்த்துவதில் இரட்டிப்பு மகிழ்ச்சியினை எமது சங்கம் பெற்றுக்கொள்கின்றது.

பாடசாலையின் கடமையினை கற்றல், கற்பித்தல் என மட்டுப்படுத்திவிடமுடியாது. பாடசாலைச் சமூகத்தின் விழுமியங்களுக்கு ஏற்ப மாணவர்களை தயார்படுத்தி விடுவதும் அதன் கடமையாக இருக்கவேண்டும். இத்தகைய தயார்படுத்தலில் உயர்தர மாணவர் ஒன்றியம் போன்ற மாணவர் அமைப்புக்கள்  போற்றத்தக்க பங்களிப்பினை வழங்குகின்றன என்றே கருதமுடியும். உயர்தர மாணவர் ஒன்றியத்தினால் வெளியிடப்பட்டு வருகின்ற ‘நதி’ சஞ்சிகையானது மாணவர்களது ஆக்கத்திறனை வெளிக்கொணர்வதற்கும், சிந்தனை ஆற்றலை வளர்த்துக்கொள்வதற்கும், தேடலுக்கான வாய்ப்பினை உருவாக்கிக்கொள்வதற்கும் வழிசமைத்து நிற்கக்கூடியது என்றால் மிகையாகாது.

இச் சஞ்சிகையின் வெளியீட்டில் உழைத்து வருகின்ற உயர்தர மாணவர் ஒன்றியத்தின் உறுப்பினர்களையும்,  ஆலோசனைகள் வழங்கி ஊக்குவித்து வருகின்ற பொறுப்பாசிரியர்களையும், நெறிப்படுத்தி வருகின்ற அதிபரையும் பாராட்டி நன்றி கூறுகின்றோம்.
ஓடுகின்ற வற்றாத நதி போன்று ‘நதி’ சஞ்சிகையும் இடைவிடாது தொடர்ந்து வெளிவந்து தனித்துவம் மிக்கதாக மிளிர்ந்து எமது கல்லூரியைப் பெருமைப்படுத்தவேண்டும் என்பது எமது சங்கத்தின் பெரு விருப்பாகும்.