கலாநிதி ஆ.தியாகராசா ம.ம.வித்தியாலயத்தின் வடக்குப்புறமாக அமைந்துள்ள முற்றப்பகுதியில் சுற்றிவர கொங்கிறீற்றிலான தொடர் அலங்கார வளைவுகள் நிர்மாணித்து அப்பகுதி வனப்புமிக்க தோற்றம் உடையதாக மாற்றி அமைக்கப்பட்டுள்ளது.
மேற்குறித்த செயற்திட்டத்திற்கு பழைய மாணவர் சங்கத்தின் கனடா கிளை ஒரு இலட்சத்து நாற்பதினாயிரம் ரூபாவினை வழங்கி உதவியுள்ளது. மொத்தமாக மூன்று இலட்சத்து நாற்பதினாயிரம் ரூபா செலவில் நிறைவுசெய்யப்பட்ட இத்திட்டத்திற்கான மிகுதி இரண்டு இலட்சம் ரூபாவினை கல்லூரியின் பழைய மாணவரும் முன்னாள் ஆசிரியரும் கொழும்பு வலயத்தில் ஆசிரிய ஆலோசகராக பணிபுரிந்தவருமாகிய திரு.தம்பையா அம்பிகைபாகன் அவர்கள் வழங்கி உதவியுள்ளார்.
வனப்பு மிக்க சூழலானது மாணவர்கள் மத்தியில் புத்துணர்வையும் மனமகிழ்வினையும் தோற்றுவித்து அவர்கள் மனதில் அமைதியும் சாந்தமும் பிறக்க வழியேற்படுத்துவதன் ஊடாக மாணவர்களின் கற்றலை மேம்படுத்த வல்லது என்பதைக் கருத்திற்கொண்டு 125வது ஆண்டு நிறைவினை முன்னிட்டு பாடசாலைச் சமூகத்தினால் தயாரிக்கப்பட்டு உதவிகோரி வெளியிடப்பட்டிருந்த செயற்திட்ட முன்மொழிவுகளில் கல்லூரி வளாகத்தினை அழகுபடுத்துவதும் உள்ளடக்கப்பட்டிருந்தமை குறிப்பிடத்தக்கதாகும்.
மேற்குறித்த பகுதியில் அழகிய பூமரங்கள், நிழல் தரும் மரங்களை நாட்டும் செயற்திட்டம் ஏற்கனவே க.பொ.த(உ-த) மாணவர்களின் சுற்றாடல் முன்னோடிக்குழு, மதர் சிறிலங்கா ஆகிய செயற்திட்டங்களின் கீழ் தேர்ந்தெடுக்கப்பட்டு இவ்வாண்டு நடைமுறைப்படுத்தப் பட்டிருந்தமை குறிப்பிடத்தக்கது.
தற்போது நிர்மாணிக்கப்பட்டு நிறைவடைந்துள்ள தொடர் அலங்கார வளைவுகளின் நூற்றுக்கு மேற்பட்ட முனைப்பகுதிகள் ஒவ்வொன்றிலும் செம்பு ஒன்று கவிழ்த்து வைக்கப்பட்டிருப்பது போன்ற உருவ அமைப்பு பதிக்கப்பட உள்ளதுடன் இதற்கு ஏற்படும் என எதிர்பார்க்கப்படும்; செலவு இருபதினாயிரம் ரூபாவினை பிரித்தானியா – காரை நலன் புரிச் சங்கத்தின் முன்னாள் தலைவர் திரு.வி.நாகேந்திரம் வழங்கி உதவியுள்ளார்.
மேற்குறித்த செயற்திட்டத்தினை நிறைவு செய்வதற்கு நிதியுதவி வழங்கி உதவிய பழைய மாணவர் சங்கத்தின் கனடா கிளைக்கும் திரு.தம்பையா அம்பிகைபாகன் அவர்களிற்கும் திரு.வி.நாகேந்திரம் அவர்களிற்கும் கல்லூரி அதிபர் திருமதி வாசுகி தவபாலன் பாடசாலைச் சமூகத்தின் சார்பில் மனமார்ந்த நன்றியினைத் தெரிவித்துக்கொள்கின்றார்.
அலங்கார வளைவுகளை நிர்மாணிக்கும் வேலைகள் நடைபெறுவதனையும் அதிபர் மேற்பார்வை செய்வதனையும் படங்களில் காணலாம்.
No Responses to “பாடசாலையின் வடக்கு பகுதி முற்றத்தில் சுற்றிவர கொங்கிறீற்றிலான தொடர் அலங்கார வளைவுகள் அமைக்கும் செயற்திட்டம் முன்னெடுக்கப்பட்டு நிறைவு செய்யப்பட்டுள்ளது”