காரை.இந்துவின் ஊட்டப் பாடசாலைகளிலிருந்து 5ஆம் ஆண்டு புலமைப் பரிசில் பரீட்சையில் சித்திபெற்ற மாணவர்களைப் பாராட்டி வாழ்த்துகின்ற பின்வரும் செய்தியினை பழைய மாணவர் சங்கத்தின் கனடாக் கிளை வெளியிட்டுள்ளது.

சென்ற மாதம் நடைபெற்றிருந்த 5ஆம் ஆண்டுப் புலமைப் பரிசில் பரீட்சையின் பெறுபேறுகளும் வெட்டுப்புள்ளி குறித்த விபரமும் ஸ்ரீலங்காப் பரீட்சைத் திணைக்களத்தினால் அண்மையில் வெளியிடப்பட்டிருந்தது. இவற்றின் அடிப்படையில் காரைநகர் கல்விக் கோட்ட நிர்வாகத்திற்கு உட்பட்ட பாடசாலைகளிலிருந்து தோற்றிய மாணவர்களுள் 25 மாணவர்கள் வெட்டுப்புள்ளிகளிற்கு மேல் மதிப்பெண்களைப் பெற்று சித்தியடைந்துள்ள விபரம் குறித்த செய்தி எமது நேச அமைப்பான கனடா-காரை கலாசார மன்றத்தின் இணையத்தளமான karainagar.com இல் பிரசுரிக்கப்பட்டுள்ளது. குறித்த செய்தியின் பிரகாரம் சித்திபெற்ற 25 மாணவர்களுள் 21மாணவர்கள் காரை.இந்துவின் ஊட்டப் பாடசாலைகளிலிருந்து தோற்றிய மாணவர்கள் என்பதையிட்டு பழைய மாணவர் சங்கத்தின் கனடாக் கிளை மிகுந்த மகிழ்ச்சியடைகின்றது. சித்தி பெற்ற குறிப்பிட்ட 21மாணவர்களையும், திருப்திகரமான மதிப்பெண்களைப் பெற்ற ஏனைய மாணவர்களையும் மனமகிழ்ந்து பாராட்டுவதுடன் அவர்கள் அனைவரும் கல்வியில் உயர்ச்சியடைந்து பல்கலையும் பெற்று சாதனையாளர்களாக மிளிரவேண்டும் என இதங்கனிந்த வாழ்த்துக்களையும் பழைய மாணவர் சங்கத்தின் கனடாக் கிளை தெரிவித்துக்கொள்கின்றது.

இதேவேளை இம்மாணவர்களைத் தயார்படுத்திவிட்ட ஆசிரியர்களையும், நெறிப்படுத்திய அதிபர்களையும், ஊக்குவித்து ஆதரவளித்த பெற்றோர்களையும் கூடவே பாராட்டி வாழ்த்துவதாகவும் பழைய மாணவர் சங்கத்தின் கனடாக் கிளை வெளயிட்டுள்ள செய்தியில் மேலும் குறிப்பிடப்பட்டுள்ளது.