கல்லூரிக் காணிகளிற்கான எல்லை வேலி தொழிலதிபர் நேசேந்திரன் அவர்களின் நிதியுதவியுடன் அமைக்கப்பட்டுள்ளது.

Spread the love

காரைநகர் இந்துக் கல்லூரியின் வடக்கு வளாகத்துடன் இணைந்த கல்லூரிக்குச் சொந்தமான காணிகள் எல்லை வேலிகள் அற்றுக் காணப்பட்டன. பழைய மாணவர் சங்கத்தின் கனடாக் கிளை, பழைய மாணவர் சங்கத்தின் கொழும்புக் கிளை, பிரித்தானியா காரை நலன்புரிச் சங்கம் ஆகிய அமைப்புக்களின் நிதி உதவியுடன் இக்காணிகள் பாடசாலையினால் கொள்முதல் செய்யப்பட்டிருந்தன. பழைய மாணவர் சங்கத்தின் முயற்சியினால் தற்போது இக்காணிகளைச் சூழவுள்ள எல்லை வேலிகளற்ற பின்னே உள்ள பகுதி கொங்கிறீற்றுத் தூண்கள் நிறுத்தப்பட்டு முட்கம்பியினாலான வேலி அமைக்கப்பட்டுள்ளது. இவ்வேலியினை அமைப்பதற்கு ஏற்பட்ட செலவான ஒரு இலட்சத்து எண்பத்து நாலாயிரத்து நானூற்று ஐம்பது(ரூ184450.00) ரூபாவினை பிரபல தொழிலதிபர் திரு.சிதம்பரப்பிள்ளை நேசேந்திரன் அவர்கள் உதவியிருந்தார். கல்லூரியின் வளர்ச்சியில் மிகுந்த அக்கறைகொண்டு பழைய மாணவர் சங்கத்திற்கு உறுதுணையாகவிருந்து செயலாற்றி வரும் திரு நேசேந்திரன் அவர்கள் கடந்த காலங்களிலும் நிதிப்பங்களிப்பு உள்ளிட்ட பலவிதமான உதவிகளையும் வழங்கி வருபவராவார். இவர் பழைய மாணவர் சங்க கொழும்புக் கிளையின் தலைவர் என்பதும் குறிப்பிடத்தக்கதாகும்.

எல்லை வேலி அமைப்பதற்குரிய நிதியினை வழங்கி உதவிய திரு,நேசேந்திரன் அவர்களின் கல்லூரி மீதான விசுவாச உணர்வினைப் பாராட்டிய கல்லூரியின் அதிபர் திரு.அ.ஜெகதீஸ்வரன் அவர்கள் பழைய மாணவர் சங்கத்தின் சார்பிலும் கல்லூரிச் சமூகத்தின் சார்பிலும் உளமார்ந்த நன்றியையும் திரு.நேசேந்திரன் அவர்களுக்கு இவ்விணையத்தளம் ஊடாகத் தெரிவிப்பதாகக் குறிப்பிட்டார்.திரு.சிதம்பரப்பிள்ளை நேசேந்திரன்