திரு தெட்சணாமூர்த்தி லிங்கேஸ்வரன் அவர்கள் தனது 60 வது வயதில் ஆசிரிய சேவையிலிருந்து இளைப்பாறுவதையொட்டி வாழ்த்துச் செய்தி வழங்குவதில் மகிழ்ச்சியடைகின்றேன்.

நான் காரைநகர் இந்துக்கல்லூரியில் கல்வி கற்ற காலப்பகுதியில் இவர் நான்கு ஆண்டுகள் முன்னதாக தரம் 9 முதல் க.பொ.த (உயர்தரம்) வரை கல்வி கற்றவர். க.பொ.த (உயர்தரம்) கணிதப் பிரிவில் கல்வி கற்ற இவர், தனது மாணவ பருவத்தில் கல்வியிலும் விளையாட்டுத் துறையிலும் சுடர் விட்டுப் பிரகாசித்த மாணவர்களில் ஒருவர் ஆவர்

இவர் தனது கல்லூரிக் காலத்தில், விளையாட்டுத் துறையில் சிறந்த ஒரு மெய்வல்லுனர் ஆகவும் உதைபந்தாட்ட வீரனாகவும் திகழ்ந்த பெருமைக்குரியவர். இவர் அங்கம் வகித்த அஞ்சல் ஓட்டக்குழு, உதைபந்தாட்டக் குழு என்பன அக்காலத்தில் யாழ் மாவட்டத்தில் வெற்றிவாகை சூடின. பாடசாலைக் காலத்திலேயே காரைநகரில் இயங்கிய விளையாட்டுக் கழகங்களின் உதைபந்தாட்டக் குழுவில் அங்கம் வகித்து தனது திறமைகளை வெளிப்படுத்தியவர்.

எமது கல்லூரியில் நான்கு அதிபர்கள் கடமையாற்றிய காலத்தில் அவர்களுக்கு உதவியாக உப அதிபராக கடமையாற்றியவர். தனது பாடசாலை என்ற உணர்வோடு பாடசாலைப் பொறுப்புக்களை நிறைவேற்றியவர். பாடசாலைக் கருமங்களுக்காக அதிபர்கள் அழைத்த போதெல்லாம் நேரங்காலம் பாராது கடமை செய்தவர். இவரது ஓய்வு காலம் சிறப்பாக அமைய எல்லாம் வல்ல இறைவனை பிரார்த்திக்கின்றேன்.

அ.ஜெகதீஸ்வரன்
அதிபர்