தான் பிறந்த மண்ணின் பெயரை தனது பெயருக்கு முன்னால் வைத்துப் பயன்படுத்தி வருவதன் மூலம் காரை.மண்ணை பெருமைப்படுத்தி வருபவர் “காரையூர்க் கவிஞர்” வடிவழகையன் அவர்கள். தமிழுலகிற்கு மட்டுமல்லாது காரை மண்ணிற்கும் அவர் கற்ற காரை.இந்துவிற்கும் பெருமை சேர்க்கும் வகையில் அமைந்திருந்தது ‘ஒரு துண்டு வானம் நிறைய நிலா’, ‘குறும்பா கொஞ்சம் குறும்பா‘ ஆகிய இரு கவிதை நூல்களின் வெளியீட்டு விழா. இவ்விழாவானது நேற்றைய தினம் ஞாயிற்றுக்கிழமை நல்லூர் துர்க்கா மணி மண்டபத்தில் யாழ்ப்பாணத் தமிழ்ச் சங்கத்தின் தலைவரும் கோப்பாய் ஆசிரியர் கலாசாலையின் பிரதி அதிபருமாகிய ‘செந்தமிழ்ச் சொல்லரிவி’லலீசன் அவர்களின் தலைமையில் நடைபெற்றது. பிரதம விருந்தினராக தமிழ்ச் சங்கத்தின் பெருந்தலைவர் கலாநிதி அ.சண்முகதாஸ் அவர்கள் கலந்து கொண்ட இவ்விழாவானது பல்கலைக்கழகப் பேராசிரியர்கள், தமிழறிஞர்கள், கவிதை ஆர்வலர்கள் என நூற்றுக்கணக்கானோரால் நிரம்பிய சிறப்பு மிக்க சபையாக அமைந்திருந்தது. யாழ்ப்பாணத் தமிழ்ச் சங்கத்தின் ஆதரவில் இவ்விழா நடைபெற்றிருந்தமை குறிப்பிடத்தக்கதாகும்.

கவிஞர் வடிவழகையனின் கவியாற்றலை, உரையாற்றிய அறிஞர்கள் பலரும் விதந்து பாராட்டியதுடன் யாழ்ப்பாணத் தமிழ்ச் சங்கத்தினால் வெளியிடப்பெற்ற வடிவழகையனின் ‘முகில் எனக்குத் துகிலாகும்’ என்கின்ற கவிதைத் தொகுப்பு நூல் இலங்கை அரசின் சாகித்திய மண்டலப் பரிசினைப் பெற்றமையானது யாழ்ப்பாணத் தமிழ்ச் சங்கத்திற்கும் பெருமையளிப்பதாகும் எனக் குறிப்பிட்டனர். காரை.மண் தந்து தமிழுலகு போற்றும் தமிழறிஞர்களின் வரிசையில் கவிஞர் வடிவழகையனும் இடம்பெற்றுள்ளார் என ‘செந்தமிழ்ச் சொல்லரிவி’ லலீசன் அவர்கள் தனது தலைமையுரையில் குறிப்பிட்டிருந்தார்.

காரை.இந்து பழைய மாணவர் சங்கத்தின் கனடாக் கிளை ‘குறும்பா கொஞ்சம் குறும்பா’ என்ற கவிதை நூலின் முதற் பிரதியைப் பெற்றுக்கொண்டு காரை.இந்துவின் மைந்தனான வடிவழகையன் அவர்களைக் கௌரவித்து ஊக்குவித்திருந்தது. பழைய மாணவர் சங்க கனடாக் கிளையின் சார்பில் கல்லூரியின் அதிபர் திரு.அ.ஜெகதீஸ்வரன் அவர்கள் முதற் பிரதியைப் பெற்றுக்கொண்டார்.

ஒரு துண்டு வானம் நிறைய நிலா என்ற கவிதை நூலின் முதற் பிரதியை கிருபா லேணேர்ஸ் முதல்வர் திரு.அ.கிருபாகரன் அவர்கள் பெற்றுக்கொண்டார்.

கவிஞர் வடிவழகையன் அவர்கள் காரை.இந்துவில் பயின்றபோது அவருக்கு தமிழ்ப் பாடத்தினைப் போதித்த பண்டிதர்.மு.சு.வேலாயுதபிள்ளை அவர்கள் வடிவழகையன் அவர்களிற்கு பொன்னாடை அணிவித்து மதிப்பளித்திருந்தார்.

நிகழ்வின் நிறைவில் முன்னணிக் கவிஞர்கள் பங்குகொண்ட ‘கடவுளுக்கு ஒரு கடிதம்’ என்ற தலைப்பிலான சிறப்புக் கவியரங்கம் சபையோருக்கு பெரு விருந்தாக அமைந்திருந்தது எனலாம்.

DAN தொலைக்காட்சியில் நூல்களின் வெளியீட்டு விழா குறித்த செய்தி ஒளிபரப்பபட்டபோதான காணொளிப் பதிவினை கீழே உள்ள இணைப்பினை அழுத்திப் பார்வையிடலாம்:

https://fb.watch/aJNQVGtulg/

இந்நிகழ்வின் சில புகைப்படங்கள் கீழே இணைக்கப்பட்டுள்ளன.

;