காரைநகர் இந்துக் கல்லூரி உயர்தர மாணவர் மன்றத்தின் ஒன்று கூடலும் மதிய போசன விருந்தும் நடராசா ஞாபகார்த்த மண்டபத்தில் 20-01-2022; வியாழக்கிழமை சிறப்பாக நடைபெற்றிருந்தது. மாணவர் மன்றத்தின் தலைவரான செல்வன் சி.சர்வேஸ்வரன் அவர்களின் தலைமையில் நடைபெற்றிருந்த இந்நிகழ்வில் பிரதம விருந்தினராக கல்லூரியின் பழைய மாணவனும், விஞ்ஞானப் பட்டதாரியும், தனியார் கல்வி நிலைய முன்னாள் இரசாயனவியல் ஆசிரியரும், மக்கள் வங்கியின் யாழ்ப்பாணக் கிளை முகாமையாளருமாகிய திரு.கணேசபிள்ளை விஜயகுமார் அவர்களும் சிறப்பு விருந்தினராக கல்லூரியின் பழைய மாணவனும் ஜேர்மன்-காரை ஒன்றியத்தின் உப தலைவருமாகிய திரு.விஜயரத்தினம் அருள்முகன்சாயிபாபா அவர்களும் கலந்து கொண்டு சிறப்பித்தனர்.

ஓய்வுநிலை அதிபர் பண்டிதர் மு.சு.வேலாயுதபிள்ளை, அயற்பாடசாலையான யாழ்ற்ரன் கல்லூரியின் உப-அதிபர், மற்றும் ஆசிரியர் திரு.சு.அருட்செல்வம் யாழ்ற்ரன் கல்லூரி உயர்தர மாணவர் மன்றத்தைப் பிரதிநிதித்துவப்படுத்திய ஐந்து மாணவர்கள், கல்லூரியின் ஆசிரியர்கள் என பலரும் இந்நிகழ்வில் கலந்துகொண்டிருந்தனர்.

கல்லூரியின் அதிபர் திரு.அ.ஜெகதீஸ்வரன், பிரதம விருந்தினர் திரு.விஜயகுமார், பண்டிதர் மு.சு.வேலாயுதபிள்ளை ஆகியோர் நிகழ்வின் நோக்கம் குறித்த தமது கருத்துக்களை பகிர்ந்துகொண்டு உரையாற்றினர். உயர்தர மாணவர் மன்றத்தின் பொறுப்பாசிரியர் திரு.ச.அரவிந்தன் அவர்கள் நன்றி தெரிவித்து உரையாற்றினார்.

இந்நிகழ்வின் சில புகைப்படங்கள் கீழே இணைக்கப்பட்டுள்ளன. எதிர்பாராதவிதமாக சில புகைப்படங்களில் ஏற்பட்ட தெளிவற்ற தன்மைக்கு வருந்துகின்றோம்.