அண்மையில் லண்டனில் அமரத்துவமடைந்த இலங்கை துறைமுக அதிகார சபையின் ஓய்வுநிலை மொழிபெயர்ப்பாளரும், தமிழ்த் தொழிற் சங்கக் கூட்டணியின் முன்னாள் செயலாளரும், தமிழ் ஆர்வலரும், உலக சமாதான சபையின் முன்னாள் செயலாளருமான அமரர் ஐ.தி.சம்பந்தன் அவர்களின் நினைவு அஞ்சலிக் கூட்டம் சுவிஸ்-காரை அபிவிருத்திச் சபையின் ஏற்பாட்டில் சென்ற 15-05-2022 ஞாயிற்றுக்கிழமை அன்று நடைபெற்றது.

ஸ்ரீ விஸ்ணு துர்க்கா திருமண மண்டபத்தில் சுவிஸ்-காரை அபிவிருத்திச் சபையின் போசகரான தவத்திரு.ஸ்ரீலஸ்ரீ சுவாமி த.சரவணஹவானந்தா அவர்களின் தலைமையில் பிற்பகல் 15.00மணிக்கு இவ்வஞ்சலிக் கூட்டம் தொடங்கி நடைபெற்றது.

அமரர்.ஐ.தி.சம்பந்தன் அவர்களது திருவுருவப்படத்திற்கு அமரரது உறவினர்களான திரு.முருகேசு சற்குணராஜா அவர்கள் ஈகைச் சுடரினை ஏற்றி வைத்தும் திரு.நடராஜா சிவலோகநாதன் அவர்கள் சந்தன மாலை அணிவித்தும் தவத்திரு.ஸ்ரீலஸ்ரீ சுவாமி த.சரவணஹவானந்தா அவர்கள் தீபாஞ்சலி செலுத்தியும் கூட்டத்தில் கலந்துகொண்ட அனைவரும் மலர்தூவியும் அஞ்சலி செலுத்தியிருந்தனர்.

தொடர்ந்து அமரர் ஐ.தி.சம்பந்தன் அவர்களினதும், புலம்பெயர் காரை.அமைப்புக்களது பங்களிப்புடன் காரைஅபிவிருத்திச் சபையினூடாக காரைநகர் மக்களின் கல்வி, குடிநீர், வாழ்வாதாரம், கலை. கலாசாரம் என்பவற்றின் மேம்பாட்டிற்காக அர்ப்பணிப்புடன் பணியாற்றி மக்கள் மனதில் நிலைபெற்று விளங்கும் அமரர் திருநாவுக்கரசு சிவாமகேசன் அவர்களினதும் ஆத்ம சாந்திக்காக அக வணக்கம் செலுத்தப்பட்டிருந்தது.

சுவிஸ்-காரை அபிவிருத்திச் சபையின் போசகரான தவத்திரு.ஸ்ரீலஸ்ரீ சுவாமி சரவணஹவானந்தா, செயலாளரான திரு.முருகேசு பாலசுந்தரம், சபையின் முன்னாள் தலைவர்களான திரு.நல்லதம்பி சரவணப்பெருமாள், திரு.ஆறுமுகம் செந்தில்நாதன், திரு.நடராஜா சிவலோகநாதன், திரு.தர்மரத்தினம் லோகேஸ்வரன் ஆகியோர் ஆற்றிய அஞ்சலி உரைகளின்போது அமரர் ஐ.தி.சம்பந்தன் அவர்களது அளப்பரிய பணிகளை உணர்வுபூர்வமாக நினைவுகூர்ந்திருந்தனர்.

நிகழ்வின்போது எடுக்கப்பட்ட புகைப்படங்கள் கீழே இணைக்கப்பட்டுள்ளன:

https://photos.app.goo.gl/Zf8Yg84nXHk6AwHv8