.காரை.இந்துவில் சுகாதாரத் தொழிலாளியாக இருபத்தைந்து ஆண்டுகளிற்கு மேலாகப் பணியாற்றி ஓய்வு பெற்றுச் செல்கின்ற திரு.மு.சிவனேஸ்வரன் அவர்களிற்கும் ஆறு ஆண்டுகளாகப் பணியாற்றி இடமாற்றம் பெற்றுச் செல்கின்ற அலுவலகப் பணியாளர் திரு.மாலோன் அவர்களிற்கும் சேவை நலன் பாராட்டு விழா கல்லூரியின் அதிபர் திரு.அ.ஜெகதீஸ்வரன் அவர்களின் தலைமையில் அண்மையில் நடாத்தப்பட்டிருந்தது.

சுகாதாரத் தொழிலாளியான திரு.சிவனேஸ்வரன் அவர்கள் கல்லூரி வளாகத்திலுள்ள பூ மரங்கள் மற்றும் நிழல்தரு மரங்கள் ஆகியனவற்றிற்கு நீர் பாய்ச்சி அவற்றினை அழகியமுறையில் பராமரிப்பதற்கு கல்லூரி நிர்வாகத்திற்கு உதவி வந்திருந்தமை குறிப்பிடத்தக்கதாகும். சிவனேஸ்வரன் அவர்களும் அவரது துணைவியாரும் பொன்னாடை அணிவித்தும், மணி விழா வாழ்த்துப்பா  வாசித்தளித்தும், அன்பளிப்பு வழங்கியும் கௌரவிக்கப்பட்டிருந்தனர்.

அலுவலகப் பணியாளராகப் பணியாற்றிய திரு.மாலோன் அவர்கள் கல்லூரியின் முன்னாள் உப-அதிபர் திரு.தெ.லிங்கேஸ்வரன் அவர்களினால் பொன்னாடை அணிவித்து கௌரவிக்கப்பட்டிருந்தார்.

அதிபரின் வேண்டுகோளுக்கமைய பழைய மாணவர் சங்கத்தின் கனடாக் கிளையினால் வழங்கப்பட்டிருந்த உதவித் தொகையும் சங்கத்தின் உதவிச் செயலாளரும் கல்லூரியின் முன்னாள் ஆசிரியையுமாகிய திருமதி அனுசூயா ஞானகாந்தன் அவர்கள் முன்வந்து வழங்கிய உதவித் தொகையும் திரு.மு.சிவனேஸ்வரன் அவர்களிற்கு அன்பளிப்பாக வழங்கப்பட்டிருந்தன.

திரு.மு.சிவனேஸ்வரன், திரு.மாலோன் ஆகியோரது சேவையினை பழைய மாணவர் சங்கத்தின் கனடாக் கிளையும் பாராட்டி அவர்களை வாழ்த்துவதில் மகிழ்ச்சியடைகின்றது.

நிகழ்வின்போது எடுக்கப்பட்டிருந்த சில புகைப்படங்கள் கீழே இணைக்கப்பட்டுள்ளன.