சுழிபுரம் விக்ரோறியாக் கல்லூரி அராலி இந்துக் கல்லூரி ஆகிய பாடசாலைகளுடனான நட்பான உதை பந்தாட்டப் போட்டிகள் நான்கில் எமது பாடசாலை அணிகள் மூன்றில் வெற்றி.

எமது பாடசாலையினதும் சுழிபுரம் விக்ரோறியாக் கல்லூரியினதும் 17வயதுக்கு உட்பட்ட பிரிவு அணிகள் மோதிக்கொண்ட நட்பான உதை பந்தாட்டப் போட்டியில் எமது பாடசாலை அணி சுழிபுரம் விக்ரோறியாக் கல்லூரி அணியை வெற்றிகொண்டது. 13 வயதுக்கு கீழ்ப்பட்ட அணிகள் மோதிக்கொண்ட மற்றொரு போட்டியிலும் எமது பாடசாலை அணியே வெற்றிக் கனியைத் தனதாக்கியது.

அதே வேளை மேற்குறித்த இரு பிரிவு அணிகளும் அராலி இந்துக் கல்லூரி அணிகளுடனும் மோதிக்கொண்டதில் எமது பாடசாலையின் 17 வயதுக்கு உட்பட்ட பிரிவு அணி அராலி இந்துக் கல்லூரி அணியை தோற்கடித்தது. 13வயதுக்கு உட்பட்ட அணி அபாரமாக விளையாடியிருந்தபொழுதிலும் வெற்றி வாய்ப்பினை இழந்தது.

இப்போட்டிகள் எமது பாடசாலை விளையாட்டு மைதானத்தில் இடம்பெற்றிருந்ததுடன் இரு பாடசாலைகளின் அதிபர்கள் விளையாட்டுத்தறை ஆசிரியர்கள் ஏனைய பல ஆசிரியர்கள் உட்பட திரளான ரசிகர்கள் இப்போட்டிகளைக் கண்டு களித்தனர். பிரித்தனியாவில் வதியும் பாடசாலையின் பழைய மாணவரும் படசாலையின் விளையாட்டுத் துறை வளர்ச்சியில் அக்கறை கொண்டு விளங்குபவருமான திரு.சுப்பிரமணியம் சர்வானந்தன் அவர்களின் உதவியுடன் உதை பந்தாட்ட அணிகளிற்கு யாழ் மாவட்டத்தின் சிறந்த பயிற்சியாளர்களுள் ஒருவரான திரு.கருணாகரன் அவர்களால் தீவிர பயிற்சி வழங்கப்பட்டு வருகிறது.

இதுவரை இவ்வணிகள் பெற்றுக்கொண்ட பயிற்சியினை பரீட்சித்துப்பார்க்கின்ற ஒரு நடவடிக்கையாக நடைபெற்றிருந்த இப்போட்டிகள் பார்க்கப்படுவதுடன் பாடசாலை அணிகள் பெற்றுக்கொண்ட வெற்றிகள் பயிற்சியின் மூலமாக அணி வீரர்கள் தமது திறனை வளர்த்துக்கொண்டமையை நிரூபிப்பதாக அமைந்துள்ளது என பாடசாலை அதிபர் தெரிவித்தார்.

அராலி இந்துக் கல்லூரியுடனான போட்டியின்போது எடுக்கப்பட்ட படங்களைக் கீழே காணலாம்