காரைநகர் இந்துக் கல்லூரி பழைய மாணவர் சங்க கனடாக் கிளையின் தலைவரான திரு.முருகேசம்பிள்ளை வேலாயுதபிள்ளை அவர்களின திடீர் மறைவானது சங்க வட்டாரத்திலும், கல்லூரிச் சமூகத்தின் வட்டாரத்திலும் பெரும் அதிர்ச்சியையும், ஆழ்ந்த துயரத்தையும் ஏற்படுத்தியுள்ளது என பழைய மாணவர் சங்க கனடாக் கிளையின் நிர்வாகத்தினால் வெளியிடப்பட்டுள்ள அனுதாபச் செய்தியில் தெரிவிக்கப்பட்டுள்ளது. இச்செய்தியில் மேலும் தெரிவிக்கப்பட்டுள்ளதாவது:

பழைய மாணவர் சங்கமானது 2012ஆம் ஆண்டு உருவாக்கம் பெற்ற காலம் முதலாக உள்ள பத்து ஆண்டுகளாக இறுதி மூச்சுவரை அதன் வளர்ச்சிக்கும் அதனூடாக கல்லூரியின் மேம்பாட்டிற்கும் வயது முதிர்ச்சியுற்றபோதிலும் மனம் தளராது உறுதியோடு தன்னலமற்று உழைத்த ஓரு உள்ளார்த்தரீதியான சேவையாளரை இழந்து பழைய மாணவர் சங்கம் பெரும் அதிர்ச்சியில் உறைந்துள்ளது. பிரதி நில அளவையாளர் நாயகம் என்கின்ற உயரிய பதவியினை வகித்து காரை.இந்துவிற்கு புகழ் சேர்த்த இவரது உயர்ச்சிக்கு காரணமாகவிருந்து அரவணைத்த காரை.இந்து அன்னை மீது அளவுகடந்த விசுவாசத்தினைக் கொண்டு விளங்கியவர். பழைய மாணவர் சங்கம் கனடாவில் உருவாக்கம் பெற்றபோது எதிர்கொண்ட சவால்களையும், தடைகளையும் தாண்டி இலக்கினை அடைவதற்கு திரு.வேலாயுதபிள்ளை அவர்களின் ஆளுமை மிக்க நிதானமான வழிகாட்டுதலும், மதிநுட்பம் மிக்க ஆலோசனைகளும் அடித்தளமாக அமைந்திருந்தன என்பது இத்தருணத்தில் பதிவுசெய்யப்படக்கூடியதாகும். அது மட்டுமல்லாது சங்கத்தின தலைவராக, போசகராக, கணக்காய்வாளராக பதவி வகித்து ஒப்பற்ற பணிகளாற்றியவர். பாடசாலையில் மேற்கொள்ளப்பட்ட வரலாற்றுரீதியான அளவிடற்கரிய பணிகளிலும், பழைய மாணவர் சங்கத்தை அபரிதமான வளர்ச்சியை நோக்கி நகர்த்திச் சென்றதிலும், இன்று பலரும் விரும்பிப் பார்க்கின்ற சங்கத்தின் இணையத்தள சேவையின் வளர்ச்சியிலும் அன்னார் வழங்கிய  பங்களிப்பு என்றென்றும் நன்றியோடு நினைவுகூரத்தக்கதாகும்.

பழைய மாணவர் சங்கமானது எவ்வித சர்ச்சைகளிலும் சிக்காது செயற்திறன் மிக்கதும் உறுப்பினர்களின் நம்பிக்கையைப் பெற்ற முன்னுதாரணமான ஒரு சங்கமாக பணியாற்றி வருகிறது என்கின்ற பாராட்டிற்குரியதாக விளங்குவதற்கு திரு.வேலாயுதபிள்ளை அவர்கள் வழங்கி வந்த ஆலோசனைகளும், அறிவுரைகளுமே காரணமாகும் என்பதில் ஐயமில்லை.

சமூக சிந்தனையும், சிறந்த கல்விப் பின்புலமும், சிறந்த குடும்ப பராம்பரியமும் மிக்க திரு.வேலாயுதபிள்ளை அவர்கள் எமது நேச அமைப்பான கனடா-காரை கலாசார மன்றத்திற்கும், ஒன்ராறியோ மாகாணத்தில் பணியாற்றி வருகின்ற ஸ்ரீலங்கா ஓய்வூதியர் சங்கத்திற்கும் தமது பெறுமதி மிக்க சேவையினை வழங்கிவர் என்பதும் குறிப்பிடத்தக்கதாகும்.

திரு.முருகேசம்பிள்ளை வேலாயுதபிள்ளை அவர்களது இழப்பு எமது சங்கத்தில் ஈடுசெய்யமுடியாத வெற்றிடத்தை ஏற்படுத்தி விட்டமை துரதிஸ்டவசமானது என்றாலும் அவர்காட்டிய பாதையில் எமது சங்கம் பயணிப்பதே நாம் அவருக்கு செய்யக்கூடிய நன்றிக்கடனாக அமையும்.

திரு.வேலாயுதபிள்ளை அவர்களது இழப்பினால் ஆற்றொணாத் துயரடைந்துள்ள அன்னாரது மனைவி, பிள்ளைகள், மருமக்கள் பேரப்பிள்ளைகள், உற்றார், உறவினர், நண்பர்கள் அனைவருக்கும் எமது சங்கம் ஆழ்ந்த அனுதாபங்களைத் தெரிவிப்பதுடன் அன்னாரது ஆத்மா சாந்தியடைய இறைவனைப் பிரார்த்திக்கின்றது.

திரு.வேலாயுதபிள்ளை அவர்கள் காரை.இந்துவின் மேம்பாட்டில் கொண்டுள்ள ஆழ்ந்த கரிசனையினையும் பழைய மாணவர் சங்கப் பணிகளில்; கொண்டுள்ள ஈடுபாட்டினையும் வெளிப்படுத்துகின்ற வகையிலும் அன்னாரின் நினைவுகளை இவ்வேளையில் மீட்டிப்பார்க்கின்ற வகையிலும் சில புகைப்படப் பதிவுகள் கீழே இணைக்கப்பட்டுள்ளன: