சமய இலக்கியப் பணிகளுக்காக இலங்கை அரசினால் வழங்கப்படும் ‘கலாபூசணம்’ விருது பண்டிதர் மு.சு.வேலாயுதபிள்ளை அவர்களுக்கு வழங்கப்பட்டமையை இட்டு பழைய மாணவர் சங்க கனடாக் கிளை தமது மகிழ்ச்சியினையும் பராட்டினையும் தெரிவித்துக் கொள்கின்றது.

காரைநகர் இந்துக் கல்லூரியின் பழைய மாணவராகிய பண்டிதர் மு.சு.வேலாயுதபிள்ளை அவர்கள் 1978 ஆம் ஆண்டில் எமது கல்லூரியின் ஆசிரியகுழாத்தில் இணைந்து இருபது ஆண்டுகள் நல்லாசிரியராகச் சேவையாற்றி பின்னர் 1998 ஆம் ஆண்டிலிருந்து ஏழு ஆண்டுகள் அதிபராகவும் நற்பணியாற்றியவர். 2005 ஆம் ஆண்டு ஓய்வுபெற்ற பின்னரும் பாடசாலையினுடன் தொடர்பாக இருந்து அதன் வளர்ச்சிப் பாதையில் உறுதுணையாக இருந்து வருபவர். அத்துடன் நீண்ட காலமாக காரைநகர் மணிவாசகர் சபையில் இவர் ஆற்றிவரும் சமயப்பணிகள் அனைவரும் அறிந்ததே.

இத்தகைய சேவையாளரான பண்டிதர் மு.சு.வேலாயுதபிள்ளை அவர்கள் ‘கலாபூசணம்’ விருது பெற்று எமது பாடசாலை சமூகத்திற்கும் பெருமை சேர்த்துள்ளார்.

பண்டிதத் தமிழுக்கோர்
பண்புடை விருது
தொண்டினைப் போற்றுவம்
தொடர்ந்து நீர் செய்வீரென
அன்புடை அனைவரும்
இன்புடன் வாழ்த்துவம்!

கலாபூசணம், பண்டிதர் மு.சு.வேலாயுதபிள்ளை அவர்களை பழைய மாணவர் சங்க கனடாக் கிளை பாராட்டிவாழ்த்துவதோடு அவரின் பணி தொடர இறையருள் கிட்ட வேண்டுமென எல்லாம் வல்ல சௌந்தராம்பிகா சமேத சுந்தரேசுவரப்பெருமானை வேண்டுகின்றோம்.