எதிர்வரும் 29ஆம் திகதி தொடங்கி நடைபெறவுள்ள க.பொ.த. சாதாரண தரப் பரீட்சையில் காரை.இந்துவிலிருந்து அறுபது மாணவர்கள் வரை தோற்றவுள்ளனர். இவர்களின் பெறுபேற்று வீதத்தினை அதிகரிக்கும் நோக்கில் அனைத்துப் பாடங்களிலும் மேலதிக வகுப்புக்கள் நடாத்தப்பட்டு வந்து நிறைவுபெற்றுள்ளதாக அதிபர் அறியத்தந்துள்ளார்.

பாடசாலை நேரத்தின் பின்னர் பிற்பகல் 1.30 மணி முதல் 3.30 மணி வரை நடைபெற்று வந்த இவ்வகுப்புக்களில் கலந்துகொண்ட மாணவர்களிற்கான மதிய உணவினை வழங்கி உதவ பழைய மாணவர் சங்கத்தின் இரு உறுப்பினர்களான திரு.சிற்றம்பலம் சச்சிதானந்தனும் திரு.கனகரத்தினம் ஈஸ்வரபாதம் அவர்களும் முழுமையான நிதிஅனுசரணையினை வழங்கியிருந்தனர். திரு.சச்சிதானந்தன் சங்கத்தின் உதவிச் செயலாளராகப் பணியாற்றி வருபவர் என்பதுடன் சிட்னி, அவுஸ்திரேலியாவில் வதியும் திரு.ஈஸ்வரபாதம் சங்கத்தின் பணிகளில் அக்கறையுடன் ஈடுபாடு கொண்டு ஆதரவளித்து வருகின்ற தொடர்பு மிக்க ஆயுட்கால உறுப்பினராகும்.

எமது பொதுவான வேண்டுகோளை ஏற்று தாமாக முன்வந்து உதவிய திரு.சச்சிதானந்தன் திரு.ஈஸ்வரபாதம் ஆகிய இருவருக்கும் பழைய மாணவர் சங்கத்தின் கனடாக் கிளை உளமார்ந்த நன்றியினைத் தெரிவிப்பதுடன் இவ்வகுப்புக்களை நடாத்த முன்வந்த அதிபர் திரு.அ.ஜெகதீஸ்வரன் அவர்களையும் பாடசாலை நேரத்தின் பின்னர் நின்று கற்பித்த ஆசிரியமணிகளையும் பாராட்டி நன்றி கூறுகின்றது.