.தனிப்பட்ட பயணத்தை மேற்கொண்டு தாயகம் சென்ற பழைய மாணவர் சங்க கனடாக் கிளையின் செயலாளரான திரு.கனக சிவகுமாரனும் உதவிச் செயலாளர் திரு.சிற்றம்பலம் சச்சிதானந்தனும் காரைநகர் இந்துக் கல்லூரிக்குச் சென்று கல்லூரியை சுற்றிப் பார்வையிட்டதுடன் நடராசா ஞாபகார்த்த மண்டபத்தில்  அதிபர் திரு.அ.ஜெகதீஸ்வரன் அவர்களின் தலைமையில் நடந்த நிகழ்வில்  மாணவர்கள், ஆசிரியர்கள், தாய்ச்சங்க நிர்வாகிகள் ஆகியோர் மத்தியில் கல்லூரியின் வளர்ச்சி சார்ந்து கருத்துக்களைப் பகிர்ந்து கொண்டனர்.

திரு.சிற்றம்பலம் சச்சிதானந்தன் உரையாற்றுகையில் எமக்கு அடுத்த சந்ததி இக்கல்லூரி வளர்ச்சியில் ஈடுபாடு காட்டுவார்களா என்பது சந்தேகமேயாகும். இக்கல்லூரியில் பயின்று கல்வியின் முக்கியத்துவத்தை உணர்ந்த விசுவாசம் மிக்க பழைய மாணவர்கள் பலரும் கல்லூரியின் வளர்ச்சிக்கு உதவுவதற்கு தயாராகவுள்ள சந்தர்ப்பத்தினைப் பயன்படுத்தி அவர்களது உதவிகளைப் பெற்று கல்லூரியின் கல்வித்தரத்தினை திட்டமிட்டமுறையில் முன்னேற்றுவதற்கு கல்லூரிச் சமூகம் முன்வரவேண்டும் எனக் கேட்டுக்கொண்டார். கற்றல் கற்பித்தல் செயற்பாடுகளை ஊக்குவித்து மேம்படுத்தவதற்கு சாத்தியமான அனைத்து உதவிகளையும் வழங்குவதற்கு பழைய மாணவர் சங்கத்தின் கனடாக் கிளை உழைத்து வருவதாக மேலும் குறிப்பிட்டார்.

இந்நிகழ்வில் திரு.கனக சிவகுமாரன் உரையாற்றுகையில், பழைய மாணவர் சங்க கனடாக் கிளை உருவாக்கம் பெற்ற வரலாறு, கடந்த பத்து ஆண்டுகளில் அது கல்லூரிக்கு ஆற்றிய மகத்தான பணிகள் என்பவற்றை விரிவாக எடுத்துக் கூறியிருந்ததுடன் 135 ஆண்டுகள் என்கின்ற நீண்ட கல்விப் பாரம்பரியத்தைக் கொண்டு விளங்குவதும், யாழ்ப்பாண மாவட்டத்திலுள்ள பழமை மிக்க வரலாற்றைக் கொண்ட பாடசாலைகளில் ஒன்றானதும், காரைநகர் மண்ணின் முக்கிய அடையாளமாக விளங்குவதுமான கீர்த்தி மிக்க காரை.இந்துவிற்கு புலம் பெயர்ந்த நாடுகளில் பழைய மாணவர் சங்கம் இல்லாதிருந்த பெருங்குறையினை பழைய மாணவர் சங்கத்தின் கனடாக் கிளையின் உருவாக்கம் நீக்கி வைத்திருப்பது மகிழ்ச்சியும் பெருமையுமளிப்பதாகவுள்ளது எனக் குறிப்பிட்டார். இச்சங்கமானது சென்ற பத்து ஆண்டுகளில்,  முக்கியமான தேவைகளிற்கான உதவிகளைப் பெற்றுக்கொள்வதில் கல்லூரிச் சமூகம் எதிர்கொண்ட சவால்களிற்கு நிரந்தரமான தீர்வினை ஏற்படுத்திக் கொடுக்க முடிந்துள்ள அதேவேளை கற்றல், கற்பித்தல் செயற்பாடுகளை மேம்படுத்தி ஊக்குவிக்கும் செயற்பாடுகளையும் திட்டமிட்டமுறையில் முன்னெடுத்து வருவதில் வெற்றிகண்டுள்ளதாகக் குறிப்பிட்டார்.;

செயலாளர் திரு.கனக சிவகுமாரன் அவர்களது சேவையைப் பாராட்டி “காரை.இந்துவின் சேவையாளன்” என்ற விருதினை பாடசாலைச் சமூகத்தின் சார்பில் அதிபர் திரு.அ.ஜெகதீஸ்வரன் அவர்கள் வழங்கி கௌரவித்தமைக்கு பதிலளித்துப் பேசிய கனக சிவகுமாரன் அவர்கள் சங்கத்தின் நிர்வாகத்தில் அங்கம் வகித்த-வகித்துக்கொண்டிருக்கின்ற உறுப்பினர்களது அர்ப்பணிப்பு மிக்க உழைப்பு, பழைய மாணவர்கள், அனுசரணையாளர்கள், நலன் விரும்பிகள் ஆகியோரது பேருதவிகள் என்பவற்றினாலேயே கல்லூரிக்கான வரலாற்றுப் பணிகளை நிறைவுசெய்து வைக்கமுடிந்தது எனக் குறிப்பிட்டு தனக்குத் தந்த கௌரவமானது இவர்கள் அனைவருக்குமான கௌரவமாகவே பார்ப்பதாகத் தெரிவித்து இங்கு தெரிவிக்கப்பட்ட அனைத்துப் பாராட்டுக்களையும் இவர்கள் அனைவருக்கும் சமர்ப்பிப்பதாகத் தெரிவித்தார்.

இந்நிகழ்வில் கலந்துகொண்டு தாய்ச் சங்கத்தின் செயலாளரான தபாலதிபர் திரு.நிமலதாசன் கணபதிப்பிள்ளை உரையாற்றுகையில் பழைய மாணவர் சங்கத்தின் கனடாக் கிளை கல்லூரியின் வளர்ச்சிக்கு ஆற்றி வருகின்ற உன்னதமான பணிகளை வெகுவாகப் பாராட்டி நன்றிகூறியதுடன் காரை.இந்துவின் உயர்ச்சியே காரை.மண்ணின் உயர்ச்சி என்பதை உணர்ந்து நாமனைவரும் செயலாற்ற முன்வரவேண்டும் எனக் கேட்டுக்கொண்டார்.

“அனைத்துலக பேசு தமிழா பேசு” என்ற சர்வதேச ரீதியிலான விவாதப் போட்டியில் பங்குபற்றி 4வது இடத்தினைப் பெற்றவாரன பழைய மாணவர் சங்க உறுப்பினர்களான செல்வநாயகம், டர்முதா தம்பதிகளின் புதல்வி செல்வி நிருத்திகா செல்வநாயகம் அவர்கள் தமக்கு வழங்கப்பட்ட பரிசுத்தொகையினை பழைய மாணவர் சங்கத்தின் கனடாக் கிளைக்கு உதவியிருந்தார். அதிபரினால் பரிந்துரைக்கப்பட்ட வாழ்வாதார வசதி குறைந்த மாணவியான 11ஆம் ஆண்டில் கல்வி பயிலும் செல்வி ராகவி சிவநேஸ்வரன் அவர்களிற்கு நிருத்திகாவினால் வழங்கப்பட்டிருந்த உதவித்தொகை வங்கியில் வைப்பிலிடப்பட்டு வங்கி வைப்புப் புத்தகம் இந்நிகழ்வில் வைத்து பழைய மாணவர் சங்க உதவிச் செயலாளர் திரு.சி.சச்சிதானந்தன் அவர்களினால் கையளிக்கப்பட்டது.

இந்நிகழ்வின்போது எடுக்கப்பட்ட புகைப்படங்கள் கீழே இணைக்கப்பட்டுள்ளன: