கொழும்பு பல்கலைக்கழகத்திற்கு உயிரியல் முறைமை தொழில் நுட்பத் துறைக்குத் தெரிவுசெய்யப்பட்ட செல்வி ஜென்சிகா தேவராசா அவர்களுக்கும் தீவக வலய மட்டத்தில் க.பொ.த.சாதாரண தரப் பரீட்சையில் மிகச் சிறந்த பெறுபேற்றினைப் பெற்று காரை.இந்துவிற்கு புகழ்சேர்த்து தற்போது க.பொ.த.உயர்தர வகுப்பில் பயின்று வருகின்ற செல்வி த.விதுசாளினி அவர்களுக்கும் பழைய மாணவர் சங்கத்தின் உதவிச் செயலாளரான திரு.சிற்றம்பலம் சச்சிதானந்தன் அவர்களால் வழங்கப்பட்ட உதவித்தொகை சென்ற 24-07-2023 செவ்வாய்க்கிழமை நடராசா ஞாபகார்த்த மண்டபத்தில் நடைபெற்ற நிகழ்வில்வைத்து மாணவிகளிடம் கையளிக்கப்பட்டுள்ளது.

செல்வி ஜென்சிகா, செல்வி விதுசாளினி ஆகியோருக்கான உதவித் தொகையினை முறையே ஓய்வுநிலை அதிபர் பண்டிதர் மு.சு.வேலாயுதபிள்ளை அவர்களும் யாழ்ப்பாணப் பல்கலைக்கழக மூத்த ஆங்கில விரிவுரையாளர் கலாநிதி வீரமங்கை ஸ்டாலினா யோகரத்தினம் அவர்களும் வழங்கி வைத்தனர்.

பல்கலைக்கழகம் அடுத்த வாரம் தொடங்கவுள்ள நிலையில் ஆரம்பச் செலவீனங்களிற்கு பயன்படக்கூடிய வகையில் செல்வி ஜென்சிகாவிற்கான உதவியும் கற்றல் செயற்பாடுகளிற்கு பயன்படும் வகையில் செல்வி விதுசாளினிக்கான உதவியும் அமைந்துள்ளன.

உதவித் தொகையினை வழங்கி உதவிய திரு.சச்சிதானந்தன் அவர்கள் பழைய மாணவர் சங்க கனடாக் கிளையின் ஊடாக பாடசாலையின் வளர்ச்சியில் மிகுந்த கரிசனைகொண்டு பல்வேறு உதவிகளை வழங்கி வருபவர். இவ்வுதவியை வழங்கிய திரு. சிற்றம்பலம் சச்சிதானந்தன் அவர்களிற்கு பாடசாலைச் சமூகத்தின் சார்பில் அதிபர் ஜெகதீஸ்வரன் அவர்கள் உளமார்ந்த நன்றியைத் தெரிவித்துக்கொண்டார்.

உதவித்தொகை வழங்கியபோது எடுக்கப்பட்ட புகைப்படங்கள் கீழே இணைக்கப்பட்டுள்ளன.