கலாநிதி ஆ.தியாகராசா ம.ம.வித்தியாலயம் தனது 125வது ஆண்டு நிறைவு விழாவினை கொண்டாடவுள்ள வேளையில் கல்லூரியின் நிறுவனர் ஸ்ரீமான் முத்து சயம்பு அவர்கள் முன்னிலைப்படுத்தப்பட்டு மதிப்பளிக்கப்படவேண்டியதன் முக்கியத்துவம் அனைவராலும் உணரப்பட்டு அன்னாரை நினைவுகூரும் பல்வேறு செயற்பாடுகள் முன்னெடுக்கப்பட்டு வருகின்றன.

இதன் ஓர் அங்கமாக கல்லூரியின் முன்னாள் உப-அதிபரும் கவிஞரமாகிய திரு.சி.பொன்னம்பலம் அவர்களின் முயற்சியினால் நிறுவப்பட்ட நிறுவனர் சயம்புவின் சிலையும் அதன் அமைவிடமும் சுற்றாடலும் விழாவிற்கு முன்னதாக புனரமைக்கப்பட வேண்டியதன் அவசியத்தை தாய்ச் சங்க நிர்வாகம் பழைய மாணவர் சங்கத்தின் கனடா கிளையிடம் தெரியப்படுத்தியதைத் தொடர்ந்து கிளை நிர்வாகம் எடுத்துக்கொண்ட முயற்சியின் பயனாக சங்கத்தின் உறுப்பினரும் ஊர்ப்பணிகள் பலவற்றிற்கு அக்கறையுடன் உதவி வருகின்றவரும் DOUBLE SEAL INSULATING GLASS LTD அதிபருமாகிய திரு.மகாதேவன் பாலசுப்பிரமணியம் இதன் புனரமைப்பு பணிகளிற்கு இரண்டரை இலட்சம் ரூபாவினை கிளைச் சங்கம் ஊடாக வழங்கி உதவினார்.

தற்போது சிலை புனரமைக்கப்பட்டு அதன் அமைவிடமும் சுற்றாடலும் அழகுபடுத்தப்பட்டு புதுப்பொலிவுடன் காட்சியளிக்கின்றது.புனரமைக்கப்பட்ட இச்சிலையானது 125வது ஆண்டு விழாவின்போது சம்பிரதாயபூர்வமாக திறந்துவைக்கப்படவுள்ளது.இச்சிலையின் புனரமைப்பிற்கு உதவிய திரு.மகாதேவன் பாலசுப்பிரமணியத்திற்கு பாடசாலைச் சமூகம் தனது நன்றியை தெரிவிக்கின்றது.புனரமைக்கப்பட்ட சிலையின் பல்வேறு கோணங்களிலிருந்தான அழகிய தோற்றத்தினை கீழே உள்ள படங்களில் காணலாம்.