அண்மையில் கனடாவில் அமரத்துவம் அடைந்த காரைநகர் இந்துக் கல்லூரி பழைய மாணவர் சங்க கனடாக் கிளை நிர்வாக சபையின் முன்னைநாள் உறுப்பினரும் இலங்கை வங்கியின் ஓய்வுநிலை உப-முகாமையாளருமாகிய அமரர் நாகராசா பாலசுப்பிரமணியம் அவர்களுக்கு கல்லூரிச் சமூகத்தின் சார்பில் ஏற்பாடுசெய்யப்பட்ட அஞ்சலிக் கூட்டம்; சென்ற 20-10-2017 வெள்ளிக்கிழமை நடராசா ஞாபகார்த்த மண்டபத்தில் நடைபெற்றது.

பழைய மாணவர் சங்கத்தின் தலைவரும் கல்லூரியின் அதிபருமாகிய திருமதி சிவாந்தினி வாகீசன் தலைமையில் நடைபெற்ற இக்கூட்டத்தில் கல்லூரி மாணவர்களும் ஆசிரியர்களும் பழைய மாணவர் சங்க உறுப்பினர்களும் கலந்துகொண்டிருந்தனர். திருமதி சிவாந்தினி வாகீசன் அவர்களும் கல்லூரியின் ஆசிரியையும் பழைய மாணவர் சங்க நிர்வாக சபை உறுப்பினருமாகிய திருமதி சிவரூபி சிவரங்கன் அவர்களும் அஞ்சலி உரைகள் நிகழ்த்தியிருந்தனர்.

அமரர் பாலசுப்பிரமணியம் அவர்கள் கல்லூரி வளர்ச்சி சார்ந்து பழைய மாணவர் சங்கத்தின் கனடாக் கிளையினூடாக ஆற்றிய பணிகள் மற்றும் கல்லூரியின் விளையாட்டுத்துறை சார்ந்து ; அவரால் ஏற்படுத்தப்பட்ட சாதனைகள் என்பன இவ் அஞ்சலிக் கூட்டத்தில் நினைவு கூரப்பட்டிருந்தன என்பதுடன் அமரர் பாலசுப்பிரமணியம் அவர்களது ஆத்ம சாந்திக்காக இரு நிமிடங்கள் மௌனம் அனுஸ்டிக்கப்பட்டது. இதேவேளை ஞாயிற்றுக்கிழமை பல்லூடக அறையில் நடைபெற்ற பழைய மாணவர் சங்கத்தின் நிர்வாக சபைக் கூட்டத்தின்போதும் அமரர் பாலசுப்பிரமணியம் அவர்களை நினைவுகூர்ந்து கூட்டத்திற்கு தலைமை வகித்த அதிபர் திருமதி சிவாந்தினி வாகீசன் உரையாற்றியதுடன் அன்னாரது ஆத்ம சாந்திக்காக மௌன அஞ்சலியும் செலுத்தப்பட்டது.

அஞ்சலிக் கூட்டத்தின்போது எடுக்கப்பட்ட படங்களை கீழே பார்வையிடலாம்: