திரு. முருகேசு யோகராசா அவர்கள் தலைமையில் அமையப்பெற்றுள்ள பிரித்தானியா-காரை நலன்புரிச் சங்கத்தின் புதிய நிர்வாகத்தினை வாழ்த்துவதில் அதன் நேச அமைப்பாகிய காரைநகர் இந்துக் கல்லூரி பழைய மாணவர் சங்கத்தின் கனடாக் கிளை பேருவகையடைகின்றது.

இடப்பெயர்வினால் சிதைவுற்ற காரை. மண்ணை மீளக்கட்டியெழுப்புகின்ற வரலாற்றுப் பணியில் பிரித்தானியா-காரை நலன்புரிச் சங்கத்தின் பங்களிப்பு அளப்பரியதாகும். பிரித்தானியா வாழ். காரை. மக்களின் ஆதரவுடன் அவ்வப்போது அமைந்த இச்சங்க நிர்வாகங்களின் ஊர்ப்பற்றுடனான அர்ப்பணிப்பு மிக்க உழைப்புக் காரணமாக காரை மண்ணிற்கான பல வரலாற்றுப் பணிகள் நிறைவுசெய்யப்பட்டுள்ளமை விதந்து போற்றுதற்குரியதாகும்.

காரை. மண்ணின் புகழை தரணியில் விளங்க வைப்பதில் பெரும் பங்காற்றி வருவதும், காரை. மக்களின் கல்விப் பராம்பரியத்திற்கு வித்திட்ட முதன்மைப் பாடசாலையும,; காரைநகரின் முக்கிய அடையாளங்களுள் ஒன்றுமாக விளங்குகின்றதும், பழைமையும் பராம்பரியமும் பெருமையும் மிக்க காரைநகர் இந்துக் கல்லூரியின் மேம்பாட்டில் பிரித்தானியா-காரை நலன்புரிச் சங்கத்தின் பங்களிப்பு முதன்மை பெறுவதையிட்டு எமது சங்கம் மகிழ்ச்சியினை வெளிப்படுத்தி நிற்கின்றது.

எமது சங்கத்திற்கும் பிரித்தானியா-காரை நலன்புரிச் சங்கத்திற்கும் இடையேயான நேச உறவு தொடர்ந்து பேணப்படுவதற்கு புதிய நிர்வாகமும் அக்கறையுடன் செயற்படும் என நம்புகின்ற அதேவேளையில் காரை.இந்துவின் மேம்பாட்டிற்கான பணி;களிலும் புதிய நிர்வாகம் கரிசனையுடன் ஈடுபடும் என நம்புகின்றோம்.

நிர்வாகம்,
காரைநகர் இந்துக் கல்லூரி பழைய மாணவர் சங்கம், கனடா